RSS訂閱 好多人都鍾意跟啲大佬搵食，外國人就會跟巴菲特、芒格，我地香港人就梗係跟大佬Webb(David Webb)，話說Webb哥上周二(16日)增持佐丹奴(00709)22.4萬股，每股平均價1.9145元，涉資42.9萬元，持股量由4.99%增至5%。
有趣嘅係，Webb哥係補充資料一欄，留下「Came back for another T-shirt（回來買另一件T恤）」句子。
老老實實，博客就好少係佐丹奴買衫，不過博客唔買，仲有好多內地客喜歡，畢竟呢個牌子由香港到傳到去成個大中華，再到成個亞洲，少說都幾十年歷史，連Webb哥都話要買埋件T恤就知架勢堂。
5%股權係一個有趣嘅數字，即係Webb哥之後嘅任何買賣都要披露(雖然夠唔夠5%佢都會自爆左先)，但買到5%以上，其實係證明左佢係睇好呢間公司先會肯披露自己嘅操作，被解讀為利好信號。
另外，佐丹奴早前舉行特別股東大會，大股東周大福企業成功罷免主席兼行政總裁劉國權，並委任鄭志雯及鄭志亮加入董事局，劉國權渣旗年代正式結束。好多股東都表示，劉國權擔正年代，公司業績萎靡不振，股價年年插水，鄭氏拎返自己做，希望可以同自己其他品牌／商場有協同效益，未必會有即時表現睇到，但睇今日股價一支大陽抽上就知道大家都幾正面。
博客唔貪心，現價入一注，企穩兩蚊先再追，追完放係倉唔會再郁佢啦，希望佢做返好個業務，係派息落手，對上一次派息係0.135元，以兩蚊股價計都有六厘，好過做定期啦。
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
